आधुनिक भारताचा इतिहास (1757-2015)

महाराष्ट्रातील विविध विद्यापीठांतील. पदवी तथा पदव्युत्तर परीक्षा, राज्यसेवा पूर्व व मुख्य परीक्षा तद्वतच संघ लोकसेवा आयोगाच्या पूर्व परीक्षेतील सामान्य अध्ययन या घटकांतर्गत व मुख्य परीक्षेतील 'इतिहास' या वैकल्पिक विषयांतर्गत समाविष्ट असलेल्या “आधुनिक भारताच्या इतिहासा'च्या अभ्यासक्रमाचा एकत्रितरीत्या व साकल्याने विचार करून साकारल्या गेलेल्या 'आधुनिक भारताचा इतिहास' या पुस्तकाची ही सुधारित व विस्तारित चौदावी आवृत्ती विद्यार्थिमित्रांच्या हाती सोपविताना कृतकृत्यतेचा आनंद लाभत आहे.

संघ लोकसेवा आयोग व महाराष्ट्र लोकसेवा आयोग यांच्या स्पर्धा परीक्षांचा अभ्यासक्रम लक्षात घेऊनच महाविद्यालयीन परीक्षांचा अभ्यासक्रम आरवला जावा, हा विचार आज वास्तवाचे रूप ल्याल्याचे महाराष्ट्रातील विविध विद्यापीठांतील पदवी व पदव्युत्तर परीक्षांचा अभ्यासक्रम पाहता स्पष्टपणे ध्यानी येते.

या नव्या प्रवाहाचा विचार करूनच पदवी वा पदव्युत्तर परीक्षांमधील आधुनिक भारताच्या इतिहासाचा अभ्यास करीत असतानाच राज्य लोकसेवा आयोगाच्या पूर्व व मुख्य परीक्षांतील इतिहास या घटकांतर्गत व केंद्र लोकसेवा आयोगाच्या पूर्व परीक्षेतील सामान्य अध्ययन या घटकांतर्गत व मुख्य परीक्षेतील इतिहास या वैकल्पिक विषयांतर्गत समाविष्ट असलेल्या आधुनिक भारताच्या इतिहासाचीही तयारी व्हावी, अशा प्रकारे प्रस्तुतच्या पुस्तकाची रचना साकारली आहे.